O acto tivo lugar o sábado 5 de xuño de 2010 e consistiu nunha recreación da Comitiva e séquito reais que cruzaron as rúas de Compostela o día 17 de setembro do ano 1.111, co gallo de coroar Rei de Galicia ó Infante Afonso Raimúndez na Catedral de Santiago.

A comitiva formárona os personaxes do rei neno Afonso Raimúndez, o Bispo Diego Xelmírez, Pedro Froilaz Conde de Traba e titor do Infante, varios grupos de nobres de León, Castela, Aragón e Galicia. O pobo de Santiago ataviado con roupaxes de época, máis músicos, bufóns, saltimbanquis, etc... pechaban a comitiva. En determinados puntos a comitiva paraba para dar paso a á figura de dúas parellas cómicas que contaron ó público as aventuras e desventuras sobre o rei neno. Acto seguido daban paso á representación deses feitos.

Os lugares escollidos para as representacións dentro do Casco Histórico compostelán foron a Praza da Inmaculada, a Praza de Cervantes, a Praza do Toural e o peche do acto, na emblemática Praza da Quintana. Este acto formou parte das actividades do III MERCADO MEDIEVAL de Santiago de Compostela, organizado polo Concello de Santiago de Compostela, que encargou a realización desta representación teatral ó Teatro de Cámara DITEA.

Prensa: http://www.elcorreogallego.es/santiago/fotos/ecg/representacion-feria-medieval/idGaleria-3546/